இனிய புத்தாண்டு வாழ்த்துக்கள் 2026

“உங்கள் கரங்களே எமது வாழ்வின் ஊன்றுகோல்; உங்கள் அன்பே எமது நம்பிக்கையின் உயிரிழை!”

புதியதோர் விடியலை நோக்கி 2026-ஆம் ஆண்டில் அடியெடுத்துவைக்கும் இவ்வேளையில், உயிரிழை முள்ளந்தண்டு வடம் பாதிப்புற்றோர் அமைப்பின் சார்பாக உலகெங்கும் வாழும் எமது உறவுகளுக்கும், நல் உள்ளங்களுக்கும் எமது மனமார்ந்த புத்தாண்டு நல்வாழ்த்துக்களைத் தெரிவித்துக் கொள்கின்றோம்.

எம்மைத் தாங்கும் நல் இதயங்களுக்கு நன்றி: உலக நாடுகள் எங்கும் பரந்து வாழ்ந்து கொண்டு, எமது அமைப்பின் வளர்ச்சிக்கும், எமது உறுப்பினர்களின் வாழ்வாதாரத்திற்கும் உதவிக்கரம் நீட்டிய அத்தனை தொண்டு நிறுவனங்கள், கழகங்கள், அரச மற்றும் அரச சார்பற்ற நிறுவனங்கள் மற்றும் தனிப்பட்ட ரீதியாகவும், குடும்பங்களாகவும் எமக்குத் துணைநின்ற அனைத்து நல்லுள்ளங்களுக்கும் எமது சிரம்தாழ்ந்த நன்றிகளைச் சமர்ப்பிக்கின்றோம்.

உங்கள் இல்லத்து நினைவுகளில் எம்மை இணைத்தமைக்கு: உங்கள் வீட்டுப் பிறந்தநாள்கள், திருமண நாள்கள் மற்றும் உங்கள் முன்னோர்களின் நினைவு நாள்கள் போன்ற விசேட தினங்களில், எமது அமைப்பின் மீது அக்கறை கொண்டு நீங்கள் வழங்கிய நிதி மற்றும் பொருளாதார உதவிகள் விலைமதிப்பற்றவை. இக்கட்டான காலங்களிலும் எங்களை மறக்காது நீங்கள் காட்டிய அந்த அன்பு, எமது காயங்களுக்கு மருந்தாக அமைந்தது.

எமது வாழ்வின் நம்பிக்கை நீங்கள்: உங்களால் தான் எமது மருத்துவம், வாழ்வாதாரம் மற்றும் அடிப்படைப் பொருளாதாரத் தேவைகள் பூர்த்தியாகின்றன. “யார் கைவிட்டாலும் நாம் கைவிடமாட்டோம்” என்று எங்களைப் பாதுகாத்து, இன்றுவரை எம்மோடு கைகோர்த்து நிற்கும் அனைத்து தமிழ் மக்களுக்கும், உயிரிழை உறுப்பினர்கள் மற்றும் நிர்வாகத்தினர் சார்பில் உள்ளங்கனிந்த அன்பையும் நன்றியையும் தெரிவித்துக் கொள்கின்றோம்.

புதிய ஆண்டின் எதிர்பார்ப்பு: கடந்து வந்த பாதையில் நீங்கள் எமக்கு வழங்கிய அதே ஒத்துழைப்பை, பிறக்கின்ற இந்த 2026-ஆம் ஆண்டிலும் தொடருவீர்கள் என்றும், உங்கள் கரங்களால் எமது வாழ்வை மீண்டும் தூக்கி விடுவீர்கள் என்றும் நாங்கள் ஆழமாக நம்புகின்றோம். உங்கள் அனைவரது வாழ்விலும் இறைவன் எல்லா நலன்களையும், வளங்களையும் வாரி வழங்க இந்த இனிய புத்தாண்டில் பிரார்த்திக்கின்றோம்.

அன்புடன், நிர்வாகத்தினர் மற்றும் உறுப்பினர்கள், உயிரிழை முள்ளந்தண்டு வடம் பாதிப்புற்றோர் அமைப்பு.